بصمة دم ( الفصل الثالث )

الفصل الثالث

(تفتح الستار على منظر منزل حديث أو قصر ومريم زوجة يعقوب جالسة تقراء في الإنجيل ثم يدخل يعقوب)
يعقوب : ازيك يامريم انت قاعدة هنا 00وايه اللى فى ايدك ده 000انجيل اه
مريم : وماله الانجيل
يعقوب : ياشيخة بلاش كلام فاضى
مريم : كلام ربنا دلوقتى بقى كلام فاضى 00دا انت اللى انسان فاضى من جوه وعمرك ما هتحس بعمق كلام ربنا
يعقوب : كفاية تحسى انتى يا هانم 00 انا من رأى تتفرجى على الفيديو والدش00امال انا دافع فيهم الشىْ الفلانى ليه
مريم : ابونا كذا مرة يسأل عليك وجالك كذا مرة ومش بيلقيك
يعقوب : (بغضب) انا مش قلت 100 مرة الراجل ده ميجيش هنا 00ياستى عايزة تقبليه ابقى روحيله الكنيسة مريم : يا يعقوب لغاية امتى هاتفضل ترفض صوت ربنا 00ارجوك 00ارجوك يا يعقوب تعالى معايا الكنيسة ولو لمرة وحدة 00صلى 00وتوب واعترف 00واتناول وانا متاكدة ان المسيح هيأثر فيك ومش هتقدر تبعد عنه بعد كدة
يعقوب : كفاية لكّ بقى وخلينى اشوف شغلى 00وانتى لابسة كدة ورايحة على فين
مريم : رايحة الكنيسة وبعد الاجتماع هاعدى على ماما مش عايز حاجة
يعقوب : (بسخرية) سلميلى على ماما 00وابقى صليلى
(تخرج ويبقى يعقوب وحده ثم يرن التليفون )
يعقوب : آلو 00ايوة انا يعقوب بيه 00اهلا ازيك ياصبحى 00لا طبعا مينفعش 00يعنى ايه مليون جنيه00خلى بالك انا اقل من 3مليون مش هبيع مفهوم 00سلام
( يدخل الخادم )
الخادم : ياسعادة البيه فى واحد برة اسمه ابو نوح وعايز يقابل جنابك
يعقوب: وعاوز ايه دا 00خليه يدخل
الخادم : حاضر ياسعادة البيه
( يخرج الخادم ويدخل ابو نوح )
ابو نوح : سعيدة يل سعادة البيه
يعقوب : اهلا عايز ايه يا راجل انت
ابو نوح : رجالتك يا بيه عايزين يا خدو الارض منى
يعقوب : يعنى هما هيخدوها ببلاش ما هيدفعولك فيها فلوس
ابو نوح : هى دى فلوس ده القراط فى المنطقة دى يجيب 10.000 جنيه ودول 6 قراريط يعنى ب60.000جنيه ورجالتك عايزيين يدونى فيها 5.000 مش حرام يابيه
يعقوب : بص انت راجل طيب وصعبت عليا وانا هديلك فيها 6.000 جنيه ها قلت ايه
ابو نوح : يابيه ده ظلم يرضى مين ده يا ناس
يعقوب : انت بتحسبها غلط 00احسبها من انك تاخد 6.000 جنيه وتحمد ربك ولا انك تسيب الارض خالص من غير ما تاخد ولا مليم
ابو نوح : انت يا يعقوب بقيت وحش قوى 000عنيك ما بقتش تشوف غير الشر لا ابوك اللة يرحمه كان كدة ولا اخوك اسحق كدة ما عرفش انت طالع لمين
يعقوب : (غاضبا) انت جاى تشتمنى فى بيت يا راجل يا مجنون انت
ابو نوح : ( غاضبا ) بتقول لراجل قد ابوك مجنون 00لا يابيه انت مش لاقى حد يقفلك لكن لا 00 انا اللى هاقفلك وهاخيرك ما بين امرين 00اما انك تسيبنى فى حالى 00اما ان الناس كلها هتعرف حكاية المخدرات اللى مخبيها فى مخزن العفش اللى فى البدروم انا شفت رجالتك وهما بيخبوها
(يظهر له الشيطان )
الشيطان : (فى خبث) ده عرف سرك 00انت لازم تخلص منه لانه ممكن يفضحك 00طلقة واحدة من المسدس ده وهتخلص منه00 خد اقتله يا يعقوب
ابو نوح : ها قلت ايه يا يعقوب بيه
يعقوب : قلت خد
(يقتله ثم يدخل اسحق على صوت الرصاص )
اسحق : ايه ده ايه صوت الرصاص اللى انا سامعه مين ده مين المقتول ده 00ده ابو نوح 00قتلته ليه
يعقوب : علشان يعرف يتكلم مع اسياده كويس ويرضه بقليله
اسحق : طيب نسيت انه وراه كوم لحم 00حتى لو غلطان ايه ذنب ولاده يتيتمه
يعقوب : ذنبهم انهم ليهم اب طماع
اسحق : وهل ده مبرر انك تقتله 00يا اخى حرام عليك
يعقوب : كفاياك يا اخى 00كفاياك بقى انا مش فاضيلك
اسحق : مش فلضيلى 00ايه وراك ايه كمان 00وراك اراضى تانيه عايز تسرقها وناس تانى تقتلها 00كفاياك بقى وادى لكل واحد حقه وارجع لربنا
يعقوب : قلتلك ملكش دعوة بيا 0ويلا 0ويلا اتفضل اطلع برة
اسحق : بتطردنى يايعقوب 00عموما انا طالع 00بس هاطلع من هنا على البوليس وهقلهم كل اللى شفته هنا
يعقوب : استنى بس يا اسحق 00ياراجل ده احنا برضه اخوات ومايرضكش ان احنا نبهدل بعض وابوك ميت
اسحق : وانت لو عامل حساب لابوك الله يرحمه كنت عملت كده وتقتل راجل بيتكلم على حقه
(اثناء ذلك يغمز يعقوب للشيطان ويقوم الشيطان بتخبئة الجثة )
يعقوب : راجل ايه بس هو فين الراجل ده
اسحق : ايه ده هو راح فين
يعقوب : قلتلك ما فيش حد 00انت هتخرف تانى
اسحق : كده 00طيب انا ماشى بس متنساش الكلام اللى قلتهولك وانى مش هسكت
الشيطان : لو سيبته هيفضحك ويوديك فى داهية لاز تخلص منه هو كمان
( يخرج يعقوب مسدس من جيبه ثم يقتل اسحق )
يعقوب : (فى لهفة) اسحق 000يا اسحق000 قوم يا اسحق انا قتلتك 00قوم 00قوم يا اخويا
اسحق : (فى صوت متقطع) يعقوب 00يايعقوب توب يا يعقوب وارجع لربنا وربنا اكيد هيسمحك
يعقوب : سماحنى 00سامحنى يا اخويا
اسحق : انا مسامحك بس انت ارجع وتوب
(صوت ثرينة بوليس )
اسحق : اهرب يا يعقوب 000اهرب بسرعة (ثم يموت )
(يهرب يعقوب فى هلع )

ستار