بصمة دم ( المشهد الثانى )

المشهد الثانى

المنظر (قبور وعليها اسماء المتوفيين وعلى كل قبة صليب ويدخل يعقوب وهو فى حالة استغراب )
يعقوب : ادى القبور واحنا دلوقتى ساعة الغروب ....ادى اول قبوة ...
وادى تانى قبوة..... وادى تالت قبوة..تمام زى ما قال عم ينى بس
فين اللى هو قال عليه .
(ترتفع ضحكة حليم الساحر ويزداد البخور )
الساحر:هاهاها ...انا الساحر العظيم ...اللى مع الكل كريم ...ادى الحلــــو
واسيب اللئيم ...مع الانس والجن كليم ...انا الساحر حليم .
يعقوب : ايه ده انت مين ؟
الساحر: ما تخفش يا يعقوب يا ابن ابراهيم يا غلبان ياللى ما معكشى تمن
باكو دخان ولا حتى علبة لبان....الديانة حجزوا عليك والفقر هلك
كل اللى ليك ...صح يا يعقوب ولا انا غلطان .
يعقوب :صح كل اللى انت قلته صح ....انت لازم فيك شئ لله...انا.......
الساحر: (مقاطعا ) من غير ما تحكى حكايتك ...انا عارف كل حاجة .....
وكويس انك جيت عندى لان انا دوا لكل مريض ....انت يا يعقوب
ظروفك صعبة ووحشة وعاوز فلوس علشان تعيش زى الناس ديه
انا هادهالك على اول الطريق .
يعقوب : قول انا فى عرضك وهاكون تحت امرك فى كل اللى تطلبه .
الساحر: هاعرفك على شخصية قوية . كل العالم تحت اديه دى ...هو رئيس
العالم وبيحقق للكل احلامه ...بس انا عايزك تسمعله وتنفذ كلامه .
يعقوب : طب فين هو الشخص ده ....؟
( يضع الساحر حليم بخور ويقول ...)
الساحر:يا حنكوش يا فنكوش ..حلق حوش ..تعالى لوحدك وهما ميجوش