دستور المرور

دستور المرور فى القاهرة : من خرج من داره اتقل مقداره


لو عربيتك كبيرة او قديمة استخدم المبدا القانونى : اللى خايف على عربيته يوسع

ملحوظة : ابعد عن سكة العربيات المخرشمة بيسوقوا بنظرية ضربوا الاعور على عينه


البوز بيز : اللى يدخل ببوز عربيته الاول للتقاطع هو صاحب اولولية المرور

احرص على ان تكون اول بوز

الاشارات تكشف نواياك للاعداء اياك ان تستخدمها

اياك ان تترك مسافة للامان بينك وبين السيارة التى امامك فهذا له عدة مخاطر
اولا : عربية تانىة حتملا المكان فى ثوانى وبرضه مش هيبقى فى مسافة امان بينك وبين اللى قدامك كل اللى كسبته انك اتاخرت ورا شوية

ثانيا : هتدى فرصة للعيال تعمل غرز قدامك

ثالثا: كل المشاه هيغمضوا عنيهم ويعدوا من الحتة دى

رابعا : اللى وراك هيقعد يزمر لك( لو كان مؤدب ) او تسمع شوية اسامى حيوانات لو كان سواق تاكسى مؤدب او هيخبطك من ورا لو كان سواق ميكروباص ودول كلهم مؤدبيين

اشارات المرور مش معمولة علشان تنظم المرور معمولة علشان شكل القاهرة يبقى متحضر بس

اعتمد على العساكر ( مع تحملك المسئولية كاملة لو حد منهم شاورلك تعدى وبلدياتنا من الناحية التانية فتح السكة للورى يعدى
او استعمل البوز بيز ( راجع القاعدة 3 )

اذا مكنتش واقف فى الصف الاول من الاشارة ف اعمل حسابك انك تزمر بشكل هستيرى ومتواصل اول ما الاشارة تفتح لان الناس اللى قدام واقفيم من زمان وممكن يكونوا نامو

احترس من 3 انواع من السائقين بيسوقوا كانهم مش ممكن يموتوا

1- العيال الروشة اللى بتلعب computer game فاكريم ممكن يكسبوا life زيادة لو ساقوا بسرعة

2- موتسيكلات توصيل الطلبات home delivery
3- سواقين الميكروباص

ملحوظة : اوعى تحاول تثبت لحد منهم ان فكرته غلط

الكناسين لازم يحللوا اللقمة اللى بيخدوها فحاول تنفعهم وترمى اى حاجة من الشباك